Shkëndija e Haraçinës 77 gati për duelin kuqezi ndaj Shkëndijës së Tetovës – Klubi apelon për disiplinë dhe qetësi në tribuna

KF Shkëndija Haraçinë 77 është në prag të një prej përballjeve më interesante të këtij sezoni, ku të dielën, më 11 tetor, në stadiumin e Çairit, do të presë Shkëndijën e Tetovës, në kuadër të xhiros së nëntë të Ligës së Parë të Maqedonisë së Veriut. Për klubin nga Haraçina, kjo ndeshje ka një rëndësi të veçantë, jo vetëm në aspektin garues, por edhe në vazhdimësinë e projektit sportiv që synon ngritjen dhe afirmimin e Shkëndijës 77 në elitën e futbollit vendor. Drejtuesit e klubit, stafi teknik dhe futbollistët janë maksimalisht të përkushtuar për këtë përballje, me synimin e qartë që të japin më të mirën në fushën e lojës dhe të luftojnë për rezultat pozitiv përballë një kundërshtari me traditë. Apel për tifozët dhe të gjithë të pranishmit Në prag të kësaj ndeshjeje, KF Shkëndija Haraçinë 77 u bën thirrje të gjithë tifozëve dhe shikuesve që do të jenë të pranishëm në stadium të tregojnë disiplinë, qetësi, kulturë sportive dhe respekt gjatë gjithë zhvillimit të takimit. Klubi kërkon që të shmanget çdo veprim, provokim apo sjellje e papërshtatshme që mund të dëmtojë imazhin, interesat apo të ardhmen e Shkëndijës 77. Interesi i klubit duhet të jetë mbi gjithçka. Çdo veprim i papërgjegjshëm në tribuna mund të sjellë pasoja dhe sanksione për klubin, prandaj kërkojmë nga secili shikues të kontribuojë në krijimin e një atmosfere të qetë, të sigurt dhe dinjitoze. Tifozët tanë janë një pjesë e rëndësishme e forcës së Shkëndijës së Haraçinës dhe mbështetja e tyre është e pazëvendësueshme. Pikërisht për këtë arsye, dëshirojmë që dashuria për klubin të shprehet përmes përkrahjes pozitive, respektit dhe sjelljes shembullore. Ne respektojmë çdo kundërshtar, por në fushën e lojës hyjmë me ambicie të qarta për të dhënë maksimumin dhe për të synuar fitoren. Të dielën, më 11 tetor, nga ora 13:00, në stadiumin e Çairit, le të tregojmë së bashku se Shkëndija e Haraçinës 77 përfaqëson jo vetëm ambicie sportive, por edhe kulturë, përgjegjësi dhe dinjitet. Bashkë për Shkëndijën 77 – me zemër në tribuna, me disiplinë dhe me respekt për klubin! KF SHKËNDIJA HARAÇINË 77 🔴⚫